【牌頭系列 - 橫床直竹擔櫈仔 】

最近有「街症院友」DM問起「橫床直竹擔櫈仔」、「水魚燉龜」同「言其塔塔冚」三種我哋都未聽過嘅牌頭,所以專程去問問身邊嘅長輩、前輩,做吓資料搜集,順便研究吓背後有無故事可以同大家分享。

何謂「橫床直竹擔櫈仔」?

唔講唔知,呢個牌頭名原來同鴉片有關。話說早期嘅香港,吸食及販賣鴉片係合法的,煙館只需向政府領牌就能營業。雖然港英政府在四十年代開始禁鴉片,但直至五十年代仍有很多私營鴉片煙檔,直至六十年代左右才徹底消失。


攝於1901年的干諾道中,當年只要領牌後就能合法吸食鴉片,所以賣鴉片可算是正當行業,從照片中更能見到鴉片公司的廣告。

一位曾出入於煙檔送外賣嘅長輩分享,當年大家都會俗稱鴉片癮君子為「橫床直竹」,簡單以四隻字描述佢哋側臥於床榻上吸食鴉片嘅姿態,當中提到嘅「竹」,正是鴉片煙槍。


至於點解「擔櫈仔」,翻查歷史照片就會發現,好多人為求以最舒適嘅姿態躺平抽煙,都會擔埋櫈仔好晾腳,驟眼睇同打橫嘅床鋪形式一個T字型態。


另外從某些照片亦會見到另一種情況,就係三五成群嘅豬朋狗友約埋一齊食,有兩個瞓上橫床,另外幾個則坐喺旁邊擔埋櫈仔食。


更有一些密集式煙館為招待更多鴉片煙民,會安排長身床榻,等大家打橫排排瞓埋一齊,就好似將骨牌打橫排列好。無論呢句俗語講緊邊種處境,其實都係對食鴉片最直接嘅描述。


「橫床直竹擔櫈仔」點開牌頭?

將骨牌分成三排,前排四戙打橫似張床;中排兩戙加後排兩戙成長方形似凳仔;三排垂直置中的六戙骨牌,則看似兩支長直竹。

疊砌方法:

1. 將32隻牌分八戙橫排,每戙四隻疊高(基本形式)。

2. 抽出左右各兩戙骨牌拍埋,放在中間四棟的後面,分前後兩排,每排四棟。

3. 再抽出後面第二排左右各一戙骨牌,放在後面置中拍埋,形成T字型態。

拎牌方法:

坊間教嘅拎牌次序,一般係為分八門嘅牌九而設。所以院友仔嘗試自行創作拎牌方式,目標係將牌分得更均勻。

1. 前排打橫的四戙從左至右順序分派給第一門至第四門 。

2. 餘下中及後排的四戙骨牌,則以「片皮」形式由面至底順序分派給第一門至第四門 。


其實牌頭術語多籮籮,如龍頭鳳尾、鳯尾龍頭、賓周一戙戙、水魚燉龜、寶子頭、寶子尾等,其命名都可以反映當時的社會面貌和文化背景,相當有趣。


如果有高人知道更多,歡迎聯絡院友賜教同交流!